Solsjleutel

Sjpeels, zjwierig
en oet ein sjtök
is hae tegeliek
sjleutel én brök
toet ’t riek
van de meziek.

‘Blieve perbere,
aldaag sjtudere
toet ’t op ‘ne keer lök’,
liek d’r te wille zègke.

Dök
kos ’t heel get enerzjie
óm dich op al die neutjes,
toe te blieve ligke.
Mer opèns kump ‘t get dunderbiej,
heurs se toch die melodie,
en veuls se ouch die harmonie.

Mit ‘forte’ meint men hel
en ‘piano’ sjteit veur zaach,
‘allegro’ det is sjnel
en ‘andante’ neet gejaag.
Ouch daomit mós se óm kènne sjpringe
es se mit wils blaoze, sjtrieke, zinge.

Solsjleutel;
symbool veur
sjoon klinkende klanke,
ammezasie en plezeer.
Laot ós d’rvan geniette
ederskeer mer weer!

mei 2001